Ófremdarástand ríkir í Barnahúsi

Börn sem hafa orðið fyrir mjög grófu kynferðisofbeldi eru á bið í meðferð í Barnahúsi vegna ófremdarástands sem þar ríkir. Forstöðumaður Barnahúss segir að það sem af sé þessu ári hafi þeim borist yfir hundrað mál þar sem grunur er um kynferðisofbeldi gegn börnum. Ekki sé nægur mannskapur eða húsrými til að sinna þessum málum sem skyldi og fjármagn til málaflokksins hafi ekki verið aukið í sex ár.

Barnahúsi hefur hingað til borist um 270 mál á ári. En á þeim tveimur mánuðum sem liðnir eru af þessu ári eru málin orðin yfir hundrað þar sem grunur er um að barn hafi orðið fyrir kynferðisofbeldi. Ólöf Ásta Farestveit forstöðumaður Barnahúss segir ástandið í Barnahúsi mjög alvarlegt. Gríðarleg aukning hafi orðið á málum og þeir fjórir sérfræðingar sem þar starfa nái engan vegin að sinna þeim sem skyldi.

Ólöf segir þau mál sem bíði mörg hver mjög alvarleg og nefnir sem dæmi tólf ára barn sem hefur verið nauðgað af bróður sínum nokkrum sinnum. Það mál þurfi að bíða vegna þess ófremdarástand sem sé nú í Barnahúsi. Orðið sé alltof þröngt um starfsemina og fjármagn til Barnahúss hafi ekki verið aukið síðan 2007.

Ólöf segir klárlega þá umræðu sem hófst í fjölmiðlum í vetur um barnaníðinga og barnaníð vera ástæðuna fyrir þeim fjölda mála sem hafi komið inn á borð til þeirra eftir áramót. Hún segir gott að umræðan sé jafn opin og hún er núna.