Mögulega hætt við Fast & Furious 7

Framleiðendur kvikmyndarinnar Fast & Furious 7 íhuga nú að hætta tökum á myndinni og byrja upp á nýtt, í kjölfar þess að Paul Walker, einn aðalleikara myndarinnar, lést í bílslysi um síðustu helgi.

Þetta fullyrðir kvikmyndavefurinn TheWrap, en tökur myndarinnar voru um það bil hálfnaðar þegar Walker lést og átti eftir að taka upp margar mikilvægar senur með Walker.

Áætlaður framleiðslukostnaður myndarinnar er tæpir 200 milljón Bandaríkjadalir, en framleiðendur myndarinnar eru tryggðir fyrir atvikum sem þessum.

Haft er eftir innanbúðarmanni að verið sé að íhuga það að gera myndina án persónu Walkers, en annar heimildamaður segir það ekki koma til greina. Þá er fullyrt að endanleg ákvörðun verði ekki tekin strax, en talsmaður Universal, framleiðslufyrirtækis myndarinnar, vildi ekki tjá sig um málið við TheWrap.

Walker lék í fimm af þeim sex myndum Fast and the Furious-myndaflokksins sem komið hafa út, en þessar gríðarlega vinsælu kvikmyndir hafa halað inn meira en 2,3 milljarða Bandaríkjadala frá því fyrsta myndin kom út árið 2001.

Leikarinn var farþegi í Porsche-bifreið sem skall á tré í borginni Santa Clarita í Kaliforníu á laugardag, og kviknaði í bílnum í kjölfarið. Walker lést við það ásamt bílstjóra bifreiðarinnar.