Breyta lögum svo námsmenn fái húsaleigubætur

Þingmenn úr öllum flokkum á Alþingi standa að frumvarpi þar sem bæta á stöðu námsmanna í námi á framhalds- og háskólastigi sem leigja í íbúðarbúðarhúsnæði í sama sveitarfélagi og þeir eiga lögheimili í.

Samkvæmt lögum um húsaleigubætur á nemi sem þarf að leigja íbúðarhúsnæði vegna náms síns aðeins rétt á húsaleigubótum ef hið leigða húsnæði sé í öðru sveitarfélagi en lögheimili nemans. Á þeim landsvæðum þar sem sveitarfélög hafa sameinast og orðið víðáttumikil blasir við að námsmenn í slíkum sveitarfélögum geta staðið frammi fyrir því að hljóta engar húsaleigubætur þótt svo það langt sé frá lögheimili þeirra á skólastað að þeir eru nauðbeygðir til að flytja þaðan og búa nær skóla á meðan á námi þeirra stendur.

Bjarkey Gunnarsdóttir, þingmaður Vinstri grænna, er fyrsti flutningsmaður frumvarpsins og er vongóð um að frumvarpið verði að lögum. Umræða um frumvarpið fer fram á Alþingi síðar í vikunni eða eftir helgi.

„Hugusnin er sú að þeir námsmenn sem búa í víðfemum sveitarfélögum og búa sem dæmi á heimavist eigi rétt á húsaleigubótum. Það gleymdist kannski að gera ráð fyrir breytingu á þessum lögum við sameiningar á sveitarfélögum. Nú á að bæta þessu við,“ segir Bjarkey í samtali við Vísi. Málið rak á fjörur hennar í eigin kjördæmi en hún var bæjarfulltrúi á Ólafsfirði um nokkurra ára skeið.

Núverandi skipulag húsaleigubóta veldur því að umsókn framhaldsskólanema um húsaleigubætur, sem búa langt frá skóla, jafnvel í margra tuga kílómetra fjarlægð, er hafnað sökum þess að skóli og lögheimili eru innan sama sveitarfélags en umsókn nema úr nágrannasveitarfélagi við skóla, sem býr tiltölulega skammt frá skólastað, er samþykkt. Lagabreytingunni er stefnt gegn þessu ólánlega og óréttláta fyrirkomulagi.