Óraunhæfar hugmyndir Vigdísar

„Það sem fyrst slær mann við þessar hugmyndir Vigdísar eru skuldbindingar okkar samkvæmt EES samningnum og síðan grundvallar hugmyndir okkar um jafnræði,“ segir Páll Rúnar M. Kristjánsson, lögmaður og einn eigenda Málflutningsstofu Reykjavíkur.

Vigdís Hauksdóttir, formaður fjárlaganefndar, sagði í Fréttablaðinu í dag að rétt sé að skoða hvort rukka eigi íslenska námsmenn sem taka námslán til að fjármagna nám erlendis en skila sér ekki heim að námi loknu um markaðsvexti af námslánunum. Misjafnlega hefur verið tekið í þessar hugmyndir Vigdísar í dag.

Páll segir að þó að þessar hugmyndir séu frumlegar og skemmtilegar sjái hann ekki fyrir sér hvernig þær gæti gengið upp: „Með þessu væru heftir frjálsir fólksflutningar milli landa á EES svæðinu og hindra fólk við að flytja á milli landa. Slíkt samrýmist tæplega skuldbindingum okkar samkvæmt EES samningnum.“

Páll segist í samtali við Vísi auðvitað ekki vita hvernig löggjafinn myndi útfæra þessar hugmyndir eða nákvæmlega hvernig svona tillögur yrðu rökstuddar.

„Ég spyr mig hvort málefnalegar ástæður standi að baki því að láta þessa einstaklinga njóta lakari réttar en annarra í sambærilegri stöðu, þetta samrýmist þannig varla heldur okkar hugmyndum um jafnræði,“ segir Páll.

Páll bendir einnig á að þeir námsmenn sem snúa ekki heim að námi loknu vegna tækifæris á hærri launum erlendis greiði sín námslán hraðar niður en þeir sem launalægri eru.

„Námsmenn sem greiða tekjutengdar afborgarnir af lánum sínum, þannig eru eðli málsins samkvæmt heimtunar alla jafna meiri hjá LÍN frá þeim sem launahærri eru og þeir aðilar líklegri til að greiða sín lán hraðar til baka en þeir sem hafa lægri tekjur,“ segir Páll.

Aðspurður um hvort hann sjái fyrir sér að slíkar hugmyndir væri hægt að útfæra með einhverjum hætti þannig að þær stæðust skuldbindingar okkar samkvæmt EES samningnum segir Páll á léttum nótum: „Það væri kannski hægt ef svona ákvæði væru heimfærð undir landbúnaðarkaflann.“