Lögreglan farin að bera fólk út af svæðinu við Gálgahraun

„Það er verið að bera menn útaf svæðinu, en það eru einhverjar skipanir skilst mér um að það eigi ekki að handataka fólk eins og í gær,“ segir Ragnar Unnarsson, náttúruverndarsinni sem er staddur við mótmælin í Gálgahrauni.

Hann segir að fjölmennt lögreglulið sé komið til að passa upp á Vegagerðina. „Það er komið nýtt dómsstig, Vegagerðardómur og lögreglan virðist vera að framfylgja þeirra dómi.“

„Jarðýturnar eru byrjaðar að vinna á fullu, þetta er rosaleg jarðýta,“ segir Ragnar.

Ragnar segir að það hafi verið svakalegt að sjá þetta í gær, þetta hafi verið leiftursókn eins og hann orðar það. Það hafi verið um 30 lögreglumenn allt í kringum gröfuna, fyrir utan hina sem voru að keyra fólki fram og til baka. „Ég hef aldrei séð annað eins.“