Newcastle vildi fá Alfreð lánaðan

Alfreð Finnbogason segir að enska úrvalsdeildarfélagið Newcastle hafi reynt að fá sig að láni undir lok félagaskiptagluggans.

Framherjinn hefur verið sjóðandi heitur með Heerenveen í Hollandi á yfirstandandi tímabili líkt og því síðasta. Hann hefur skorað ellefu mörk í sjö leikjum í öllum keppnum.

„Ég heyrði að þeir komu með tilboð um að fara á láni undir lok gluggans en fyrir mig var það ekki möguleiki að far eitt né neitt að láni,“ sagði Alfreð í viðtali í Reitaboltanum í dag.

Alfreð og félagar taka á móti Cambuur í hádeginu á sunnudaginn. Heerenveen situr í fjórða sæti deildarinnar með tólf stig. Alfreð er markahæsti leikmaður deildarinnar með níu mörk.