Leikskólinn 101: Foreldrar krefjast forgangs á aðra leikskóla

Foreldrar barnanna sem voru í vistun á ungbarnaleikskólanum 101 krefjast þess að börnum þeirra verði boðin forgangspláss á öðrum leikskólum borgarinnar.

Þetta kom fram á fundi sem haldinn var af Reykjavíkurborg vegna málsins í gær og í fréttatilkynningu sem skóla- og frístundasvið borgarinnar sendi á fjölmiðla nú fyrir hádegi. 

„Fram kom hjá foreldrum að neyðarástand ríkti og því yrði borgin að taka af skarið og bjóða þeim forgangspláss á leikskólum borgarinnar. Börnin hefðu hugsanlega orðið fyrir ofbeldi í leikskólanum sínum sem hlyti að tryggja þeim ákveðinn forgang. Þeirri hugmynd var varpað fram að borgin myndi reyna að koma nokkrum börnum fyrir á nærliggjandi leikskólum,“ segir í fréttatilkynningunni.

Þar segir einnig að Hildur Skarphéðinsdóttir, skrifstofustjóri leikskólamála hjá skóla- og frístundasviði borgarinnar, hafi sagt á fundinum að staða borgarinnar væri þröng þegar kæmi að lausum leikskólaplássum, sérstaklega í Vesturbæ og nærliggjandi hverfum, en að möguleiki væri á lausum plássum hjá dagforeldrum og ungbarnaleikskólum í öðrum hverfum.

Ragnar Þorsteinsson, sviðsstjóri skóla- og frístundasviðs borgarinnar, sagði þá að stefna borgarinnar væri sú að bjóða þeim sem yrðu tveggja ára á árinu leikskólapláss auk barna sem hafa skilgreindan forgang samkvæmt reglum um leikskóla og að fáein börn af ungbarnaleikskólanum 101 væru að komast á þann aldur að eiga rétt á dagvistun í borgarreknum leikskólum.

„Skóla- og frístundasvið er ennfremur að vinna með öðrum sjálfstætt starfandi ungbarnaleikskólum um að fjölga plássum sem foreldrar leikskólabarna í 101 gætu þá sótt um til að leysa bráðavanda þeirra,“ segir í tilkynningunni.