Árni Páll segir ótrúlegt að forsetinn geri ekki greinarmun á sköttum og gjöldum

„Það er ekki góðs viti að í yfirlýsingunni sé ekki sé meiri skilningur á séreðli afgjalds fyrir afnot af sameiginlegum auðlindum,“ segir Árni Páll Árnason formaður samfylkingarinnar í samtali við Vísi um yfirlýsingu forseta Íslands þar sem forsetinn segist ætla að staðfesta lög um sérstakt veiðigjald.

Árni Páll  segir að margt í rökfærslu forsetans stingi í augun og þá helst hvernig hann talar um að gjöld séu í raun skattur í hefðbundnum skilningi.

Í rökstuðningi forsetans, um að senda lög um sérstakt veiðigjald ekki í þjóðaratkvæði, segir meðal annars að um sé að ræða tímabundnar breytingar á sköttum vegna ríkisins og að ekki sé því vænlegt að vísa málinu í þjóðaratkvæði.

„Hér er um að ræða sérleyfi til að nýta sameiginlegar auðlindir þjóðarinnar og afgjald fyrir það er ekki skattur,“ segir Árni Páll sem telur forsetann ganga ansi langt með því að halda því fram að ekki sé til neitt sem heiti auðlindarenta.

"Forsetinn er í raun að segja að allt sem lúti að afgjaldi fyrir afnot að sameiginlegum auðlindum sé í raun bara skattur í hefðbundnum skilningi, sem er bara ekki rétt," bætir Árni Páll við.

Árni Páll segir alveg ljóst að hann og aðrir í stjórnarandstöðunni muni fylgjast grannt með því með hvaða hætti verði gegnið fram hvað varðar gjaldtökur fyrir sameignilegar auðlindir eftir þann rökstuðning sem forsetinn setti fram.

"Miðað við rökin sem að forsetinn færir fram hefur stjórnarmeirihlutinn afar lítið svigrúm til þess að lækka  þessi gjöld með varanlegum hætti. Forsetinn leggur sérstaka áherslu á að um sé að ræða tímabundna löggjöf og því þurfum við að fylgjast vel með ef ríkisstjórnin ætlar að endurskoða lögin þannig að menn afsali þjóðinni réttinum til sanngjarns endurgjalds."