Segir munnmök hafa orsakað krabbameinið

Stórleikarinn Michael Douglas segir í viðtali við Guardian að munnmök hafi verið orsök þess að hann fékk krabbamein í háls.

Þegar blaðamaður spurði hann hvort hann sæi eftir því að hafa reykt og drukkið árum saman, þar sem það væri yfirleitt orsök meinsins svaraði Douglas: „Nei. Án þess að vilja fara út í smáatriðin þá fékk ég krabbameinið vegna HPV-veirunnar, sem ég fékk við að stunda munngælur.“

Douglas sagðist hafa í fyrstu haldið að streita vegna handtöku og fangelsunar sonar síns hefði verið orsök sjúkdómsins en fyrrnefnd HPV-veira hafi reynst sökudólgurinn.

Þá segir Douglas bestu lækninguna vera meiri munnmök, en læknirinn Mahesh Kumar segir það vera þvaður. „Kannski heldur hann að það að vera í sífelldri snertingu við veiruna geri ónæmiskerfið sterkara, en læknisfræðilega er ekkert vit í því.“