Innlent

Sömu ósvöruðu spurningar og í kosningabaráttunni

Boði Logason skrifar
Katrín Jakobsdóttir, formaður Vinstri Grænna.
Katrín Jakobsdóttir, formaður Vinstri Grænna. Mynd/Stefán Karlsson

„Það sem slær mann algjörlega við fyrstu yfirsýn er að þetta er svona nokkuð almennt orðað,“ segir Katrín Jakobsdóttir, formaður Vinstri Grænna, um stjórnarsáttmálann sem Sigmundur Davíð Gunnlaugsson, formaður Framsóknarflokksins, og Bjarni Benediktsson, formaður Sjálfstæðisflokksins, undirrituðu á Laugarvatni í dag.

Katrín segir í samtali við fréttastofu að engar útfærslur séu lagðar fram í stærsta kosningamáli Framsóknarflokksins, skuldamálum heimilanna. „Það kemur ekkert fram annað en það verði farið í almennar aðgerðir svo fremur sem samningar við kröfuhafa náist og svigrúm skapist,“ segir Katrín. „Við erum að sjálfsögðu reiðubúin til þverpólitísks samráðs um þær útfærslur úr því að þær liggja ekki fyrir.

Þá segist Katrín hafa áhyggjur af því að Umhverfisráðuneytið verði sameinað öðru ráðuneyti. „Þær hugmyndir vekja áhyggjur okkar sem höfum áhyggjur af „grænu málunum“ - að stjórn umhverfismála muni veikjast verulega. Það er kannski ekki mikið í stjórnarsáttmálunum í þeim málum, nema að styrkja ímynd Íslands á sviði umhverfismála. Það er margt sem á eftir að koma í ljós og mun væntanlega skýrast á fyrstu dögum þingsins.“

Hún setur einnig spurningarmerki við það að engin tímasetning sé sett á hvenær nákvæmlega þjóðaratkvæðagreiðslu um inngöngu landsins inn í Evrópusambandið fari fram.

„Það er ekki mörgum spurningum sem hefur verið svarað, þetta eru sömu spurningar og voru uppi í kosningabaráttunni,“ segir Katrín að lokum um stjórnarsáttmálann.




Fleiri fréttir

Sjá meira


×