Þingfundi frestað meðan sáttatillögur eru ræddar

Þingfundi sem hefjast átti klukkan hálf ellefu var frestað til klukkan hálf tólf. Stjórn og stjórnarandstaða eru væntanlega að leggja lokahönd á samkomulag sem fæddist í gærkvöld um þinglok. Fyrir fundinum liggja tuttugu og eitt mál, þau fyrstu um náttúruvernd og stuðningsaðgerðir vegna uppbyggingar á Bakka.

En Alþingi lýkur svo væntanlega störfum seint í dag eða kvöld með samþykkt frumvarps um breytingar á breytingarákvæði stjórnarskrárinnar, sem gerir mögulegt að breyta stjórnarskrá á næsta kjörtímabili án þess að boða strax til kosninga.