Buðu björgunarsveitarmönnum í hádegismat

„Þetta æxlaðist þannig að ein kona sem starfar hjá okkur er í björgunarsveitinni í Garðabæ.

Hún er bara í viðbragðsstöðu en við ákváðum í hádeginu að bjóða þeim sem komust í mat," segir Gísli Þorsteinsson, markaðsstjóri Nýherja, en fyrirtækið bauð björgunarsveitarmönnum í hádegismat í dag til þess að hvíla lúin bein eftir erfið verkefni morgunsins.

Og það var enginn smáveisla í boði, björgunarsveitarmenn gæddu sér á ofnbakaðri keilu í hvítlaukssósu og með því fengu þau sellerí súpu.

Gísli segir að tíu manns hafi komið en tveir hópar frá björgunarsveitinni voru á ferð um borgina í morgun og í dag til þess að hjálpa almenningi. „Hinn hópurinn var of langt í burtu," útskýrir Gísli.

Hann segir að ástandið hafi verið ansi slæmt í morgun í kringum höfuðstöðvar Nýherja sem eru í Bogrartúninu, en þaðan hafa þua útsýni yfir Sæbrautina. „Þetta virðist þó vera að skána eitthvað," segir Gísli.

Allar björgunarsveitir voru kallaðar út í morgun til þess að aðstoða þá sem festust í umferðinni en fjölmargir máttu dúsa í bílum sínu á Vesturlandsvegi klukkustundum saman í morgun.

Eins var með ökumenn og farþega á Reykjanesbrautinni í Hafnarfirði. Þá varð hátt í 20 bíla árekstur á Hafnarfjarðarveginum nærri Kópavogslæknum í morgun. Mikið tjón varð þó enginn hafi slasast alvarlega.

Hér má sjá fleiri myndir úr hádegismatnum.