Vantrauststillaga Þórs tekin fyrir á mánudaginn

Vantrauststillaga Þórs Saari, þingmanns Hreyfingarinnar, verður tekin fyrir næstkomandi mánudag en ekki á morgun eins og til stóð.

Þór fór raunar fram á að tillagan yrði strax tekin fyrir í dag en ekki reyndist vera meirihluti fyrir flýtimeðferð. Þór er ósáttur við það að tillagan verði ekki tekin á dagskrá á morgun. „Forseti Alþingis og meirihlutinn eru að misbeita valdi sínu," segir Þór í samtali við Vísi en tillagan verður fyrsta mál á dagskrá á mánudaginn.

Spurður hvort hann sé bjartsýnn á að tillagan verði samþykkt svarar Þór. „Ég held að það séu líkur á því að hún verði samþykkt."

Fari svo að tillagan verði samþykkt er lagt til í tillögunni að allir flokkar á þingi myndi starfstjórn fram að kosningum sem eru eftir um 7 vikur.

Þór segist hafa orðið var við mikla óánægju innan meirihlutans og segist hafa heyrt af því að sumir þingmenn meirihlutans íhugi að mæta ekki í atkvæðagreiðsluna á mánudaginn.

Fréttastofa RÚV telst til að 31 þingmaður, að minnsta kosti, muni segja nei við tillögu Þórs Saari, allir þingmenn Samfylkingar og tíu þingmenn Vinstri grænna. Auk þess ætla þingmenn Bjartrar framtíðar, Guðmundur Steingrímsson og Róbert Marshall að verja stjórnina falli.