María Birta flott í tauinu á frumsýningu XL

María Birta virðist vera með buxnadragta-trendið alveg á hreinu, en eins og Lífið greindi nýlega frá verða þær það allra heitasta með vorinu. María tók trendið alla leið og mætti glerfín í buxnadragt frá Kormáki og Skildi, með slaufu og axlabönd á frumsýningu XL um helgina. Lífið heyrði stuttlega í Maríu.

Hvers vegna urðu þessi föt fyrir valinu? Ég vildi ekki vera í einhverjum rosa fínum kjól, en ég vildi samt vera fín, svo jakkafötin virtust tilvalin. Einnig fannst mér mjög mikilvægt að vera í einhverju sem mér gæti liðið vel í.

Hafðirðu hugsað mikið um hverju þú ætlaðir að klæðast? Nei, ég var eiginlega viss um að jakkafötin yrðu fyrir valinu sama hvað, var bara ekki alveg viss hvort ég yrði í stuði fyrir bindi eða slaufu en ákvað svo að vera með slaufuna.

Fannst þér þessi klæðnaður henta þér betur heldur en fínn kjóll, sem er kannski hefðbundnari frumsýningarklæðnaður? Mér fannst hann henta mér betur í þetta skiptið en þeir sem þekkja mig vel vita alveg hversu mikill strákur ég er inn við beinið. Ég held að þetta hafi komið fáum á óvart.

Hver eru þín uppáhalds tískutrend um þessar mundir? Dragtir og jakkaföt, allt sem er unisex og leður.