Norðlensku netníðingarnir opna nýja síðu til þess að niðurlægja konur

Norðlensku netníðingarnir halda áfram en þeir hafa opnað nýja síðu þar sem gert er út á niðurlægjandi framkomu gagnvart konum.

Áður hélt sami hópurinn úti síðunni Karlar eru betri en konur, en þeirri síðu var lokað skömmu eftir að þeir birtu mynd af nemanum Þórlaugu Ágústsdóttur, sem sýndi hana með áverka á andliti. Á myndinni stóð svo: „konur eru eins og gras, það þarf að slá þær reglulega."

Þema nýju síðunnar er með svipuðum hætti og á þeirri fyrri. Þar má finna naktar konur bundnar og í niðurlægjandi stellingum. Meðal annars þrýstir karlmaður höfði konu niður í gólfið með skósólanum. Þá má finna mikið af niðrandi ummælum um kvenmenn. Meðal annars í lýsingum á síðunni, sem er eftirfarandi:

„Stelpuís (betur þekktar sem tussur; femínistatíkur ef þær eru vangefnari) eru heimskari og óæðri kynkjötstykkin kringum leggöngin."

Þórlaug Ágústsdóttir upplýsir í viðtali við Akureyri Vikublað að netníðingarnir séu norðlenskir. Meðal annars frá Húsavík. En hún tilkynnti meðal annars málið til barnaverndaryfirvalda á Húsavík. Það gerði hún í upphafi mánaðarins.

Svo virðist sem engan bilbug sé að finna á netníðingunum. Meðal annars stofnuðu þeir síðuna umræddu, sem Vísir mun ekki hlekkja á, 6. janúar, eða skömmu eftir að Þórlaug tók til sinna ráða og tilkynnti málið til yfirvalda.

Þá bregðast níðingarnir við frétt Akureyri Vikublaðs með þessum hætti á síðu sinni:

„Team Iceland er að koma að busta okkur!! Panic!! what to do! what to do!!! sérsveitin að koma að banka upp á dyrnar hjá mér! Ahhhhhhhh".

„Það er reyndar ágætt að þeir séu að þessu, enda eru þeir óaðvitandi að leggja til efni til þess að bæta öryggið á Facebook," segir Þórlaug í samtali við Vísi en hún vinnur nú að því í samstarfi við Facebook að efla öryggið á samskiptavefnum. Það gerir hún meðal annars með því að skoða fyrrnefnda síðu sem enn er opin.

„Ég ætti nú eiginlega að þakka þeim fyrir það," segir Þórlaug, en Facebook bað hana afsökunar fyrir áramót eftir að fyrirtækið neitaði að fjarlægja myndina af henni. Til þess að bæta fyrir mistökin hóf fyrirtækið samstarf með Þórlaugu svo það sé hægt að bregðast við svona löguðu á samskiptavefnum.

Vísir ræddi við móður eins piltsins sem hefur verið tilkynntur til barnaverndaryfirvalda. Hún sagðist ekki kannast við málið, í það minnsta hafði barnaverndaryfirvöld ekki sett sig í samband við hana að eigin sögn.