Ritstýra Vogue nýr stílisti Balenciaga?

Sá orðrómur er uppi í tískuheiminum að fyrrverandi ritstýra franska Vogue, Carine Roitfeld, sé á leið til tískuhússins Balenciaga. Þar myndi hún starfa með Alexander Wang, en hann tók nýlega við af Nicolas Ghesquière sem yfirhönnuður þar á bæ. Roitfeld og Wang hafa starfað saman áður og á það að hafa verið Wang sem bauð henni stöðuna.

Ef af verður mun Roitfeld taka við af stílistanum Marie- Amélie Sauvé sem hefur starfað hjá fyrirtækinu um árabil.

Hvort sem orðrómurinn er sannur eða ekki liggur ljóst fyrir að miklar breytingar eru í vændum hjá Balenciaga. Fyrsta lína Wangs lítur dagsins ljós á tískuvikunni í febrúar og verður spennandi að sjá hvort Carine Roitfeld muni eiga þátt í henni eða ekki.