Farðaði heimsfrægan fótboltamann

Lífið heyrði stuttlega í Elínu Reynisdóttur förðunarmeistara sem býr í Dubai ásamt eiginmanni og tveimur börnum. Elín hefur unnið við fjölda spennandi verkefna í Saudi Arabíu og nú síðast farðaði hún engan annan en Raul einn frægasta fótboltamann Spánverja sem spilaði með með Real Madrid 1992-2010.

Hvernig stendur á því að þú varst að farða stjörnuna? "Ég var að vinna í sjónvarpsauglýsingu í fjóra daga í Quatar Doha fyrir Bank of Quatar og í henni voru fullt af íþróttastjörnum, aðallega stjörnur í Quatar. Þar voru arabameistarinn í boxi, körfuboltalið Quatar, sund- og dýfingafólk, fimleikafólk, spretthlauparar, langhlauparar og margir aðrir. Hann Raul var aðalstjarnan. Ég hafði ekki hugmynd um að hann væri frægur fótboltamaður. Ég hélt fyrst að hann væri einn af hlaupurunum," svarar Elín.

Hvernig var að vinna með kappanum? "Hann var algjört yndi og var að segja mér frá því að hann ætti fimm börn, fjóra stráka og svo loksins eina stelpu. Hann sýndi mér myndir mjög stoltur," útskýrir Elín.