Hálfmaraþon og maraþon – á einni helgi

Popparinn Joey Fatone brosti blítt þegar hann kom í mark eftir að hafa hlaupið maraþon í skemmtigarðinum Disney World fyrir stuttu. Hann var samt sem áður frekar þreyttur. Ekki furða – hann hljóp hálfmaraþon deginum áður.

Þetta prógramm kallast Goofy Challenge og er mjög vinsælt meðal hlaupara. Eiginkona Joey, Kelly, hefur hlaupið þetta síðustu tvö árin en hún fótbraut sig fyrir tveimur mánuðum. Þá tók Joey af skarið og ákvað að hlaupa í hennar stað.

"Ég sagði bara að ég skyldi gera þetta fyrir hana. Og allt í einu langaði mig virkilega að gera þetta fyrir hana," segir Joey, sem er hvað þekktastur úr strákasveitinni N Sync.

Joey hljóp hálfmaraþonið á þremur tímum og tíu mínútum enda hljóp hann í mínútu og gekk rösklega í eina mínútu til skiptis. Maraþonið kláraði hann á sex klukkutímum og nítján mínútum.

"Líkaminn getur svo mikið ef maður er andlega undirbúinn. Mér finnst ég geta gert allt núna. Það er frábær tilfinning," segir þetta hörkutól.

Þú gætir unnið - vertu með okkur á Facebook.