Anna Mjöll dæmd til að borga bílasalanum

Eins og RÚV greindi frá fyrr í kvöld var íslenska djasssöngkonan Anna Mjöll Ólafsdóttir dæmd samkvæmt bráðabirgðarúrskurði dómara í Los Angeles í desember á síðasta ári til að greiða fyrrum eiginmanni sínum, bílasalanum Cal Worthington, hvorki meira né minna en tæpar 30 milljónir íslenskar krónur. Cal heldur því fram að Anna hafi tekið peningana út af reikningi sínum á meðan þau voru gift. Verði málinu ekki áfrýjað er um að ræða endanlega niðurstöðu. Þá kemur einnig fram í úrskurðinum að eign fyrrum hjónanna sem er í Beverly Hills og er metin á 386 milljónir króna skuli verða sett á sölu ásamt innbúi. En umrædd upphæð sem Önnu ber að greiða milljónamæringnum verður dregin frá þeirri upphæð sem fæst fyrir eignina og mun íslenska söngkonan halda eftirstöðvunum. Anna hefur alltaf haldið því fram að hún hafi átt helming í húsnæði sem Cal keypti á meðan þau voru saman. Anna og Cal, sem er 92 ára gamall, voru gift um nokkurra mánaða skeið. Hann er frægur bílasali vestan hafs og á sand af seðlum. Hjónabandið gekk hins vegar ekki upp. Bílasalinn segir að Anna hafi gengist undir kaupmála og hafi því aðeins átt rétt á um 4 milljónum króna.