Vala Matt einblínir á hollustuna

"Ég var með eitt áramótaheit að þessu sinni en það tengist glænýju verkefni sem ég er að byrja á en get ekki sagt frá strax" segir Valgerður Matthíasdóttir athafna- og fjölmiðlakona með meiru og brosir leyndardómsfull þegar Lífið spyr hana út í verkefnin sem hún vinnur að núna í upphafi nýs árs 2013.

Hvernig kemur þú undan jólunum? "Ég kem vel undan hátíðarhaldinu. Hef sjaldan borðað minna af óhollustu um hátíðir. Held að allt sem ég hef lært til dæmis af snillingum eins og Sollu Eiríks og Lukku á Happ hafi komið sér vel því ég var með dýrindis sælgæti án sykurs og óhollustu og einnig bjó ég til fullt af hollustudrykkjum til að vega upp á móti þungum máltíðum. Ég veit að þetta hljómar dáldið "boring" en er bara löngu orðinn lífsstíll hjá mér og alveg nauðsynlegt til að mér líði vel," segir Vala.

Hvað stendur upp úr hjá þér árið 2102? "Eitt af því sem stendur upp úr hjá mér á árinu var þegar ég hellti mér út í útgáfu og bjó til sælkeraverkefnið mitt Sælkeraleiðarvísir/Icelandlocalfood með sælkerabæklingi og heimasíðunni Icelandlocalfoodguide.is sem nú fer brátt af stað aftur fyrir næsta sumar. Ótrúlega skemmtilegt fjölmiðlaverkefni sem hefur átt hug minn allan."