Kröfðust þess að félaginn yrði leystur úr haldi

Lögreglan á höfuðborgarsvæðinu var kölluð að fjölbýlishúsi í austurborginni um eitt leitið í nótt, vegna hávaða frá samkvæmi. Húsráðandi, sem er kona á þrítugsaldri, lofaði að lækka í tækjunum og þagga niður í gestunum, en þegar það gekk ekki eftir kom lögreglan aftur á vettvang.

Þá bað húsráðandi um aðstoð við að koma gestunum út. Þegar því var lokið og lögreglumenn komu aftur út, hafði einn gestanna girt niður um sig og sat berrassaður á vélarhlíf lögreglubílsins.

Hann veitti mikinn mótþróa við handtökuna, en var vistaður í fangageymslu. Nokkrir gestanna komu nokkru síðar á lögreglustöðina við Hverfisgötu og kröfðust þess að fá manninn lausan, og var nokkuð ónæði af þeim þar, segir í skeyti frá lögreglunni.