Skiptir sviðinu út fyrir sendibílinn

"Þeir eru margir sem hafa haft samband við mig og undrast yfir fjarveru minni í ár, en mér þykir mjög vænt um það," segir söng-og leikkonan Margrét Eir, sem ætlar ekki að stíga á svið með Frostrósum þessi jólin.

Undanfarin tíu ár hefur jólaundirbúningur Margrétar verið undirlagður af jólatónleikum Frostrósa. Það var sameiginleg ákvörðun hennar og aðstandenda tónleikana að hún tæki sér pásu í ár. "Ég hef verið með frá upphafi en tel að það sé mjög mikilvægt fyrir viðburð á borð við þennan, sem er búinn að festa sig í sessi, að vera með ákveðna fjölbreytni og bjóða nýjum andlitum að taka þátt," segir Margrét en staðfestir að það verði óneitanlega öðruvísi jól hjá henni í ár.

"Ég var einmitt að segja við manninn minn að ég vissi bara ekkert hvað ég ætti af mér að gera um jólin núna þegar ég yrði heima. Ætli ég snúi mér ekki bara að þessu hefðbundna jólastússi loksins, eins og að baka."

Þrátt fyrir að vera ekki með í Frostrósum í ár hefur Margrét í nógu að snúast þar sem hún er bæði að æfa Mary Poppins í Borgarleikhúsinu og gefa út disk með sveit sinni Thin Jim, This Is Me. "Það er í nógu að snúast en við hjónin erum bæði að gefa út og dreifa plötunni sjálf svo ég er eiginlega búin að skipta út sviðinu fyrir sendibílinn í desember."

- áp