Nágranni Toms Cruise var skotinn með rafbyssu

Íslandsvinurinn Tom Cruise varð fyrir þeirri óskemmtilegu lífsreynslu í gær að drukkinn nágranni reyndi að klifra yfir á lóðina sem umlykur hús hans í Beverly Hills. Lögreglan skaut þann drukkna með rafbyssu. Hvorki Cruise né börnin hans voru heima þegar atvikið varð.

Lögreglan segir að hugsanlegt sé að maðurinn, hinn 41 árs gamli Jason Sullivan, hafi ruglast eitthvað í ríminu. Hann hafi verið mjög drukkinn. Maðurinn var handtekinn strax eftir að hann var skotinn með byssunni, eftir því sem fram kemur á vefnum Newsday.

Eins og kunnugt er kom Tom Cruise hingað til lands í sumar þegar atriði úr myndinni Oblivion voru tekin upp hér.