Pólitísk sýning um innri frið

Myndlistarmaðurinn Þorlákur Kristinsson Morthens - Tolli - fagnar 30 ára starfsafmæli um þessar mundir og opnar af því tilefni sýninguna Friður í Smiðjunni Listhúsi á morgun.

„Ég tileinka sýninguna því að það eru 30 ár síðan ég hélt ásamt félögum mínum sýninguna „Sjö" í Norræna húsinu árið 1982, sem var eiginlega upphaf „nýja málverksins" svokallaða hér á landi.

Það hefur verið töluverð breyting frá þessum hráa pönkaða stíl sem ég hafði í upphafi yfir í þessar ljóðrænu landslagsmyndir, sem ég hef einbeitt mér að í seinni tíð, og endurspegla fremur andlega heim en efnislegan. Sá heimur ber með sér frið og hugarró."

Tolli segir ferilinn vera skrásetningu á ástandi listamannsins á hverjum tíma og í sínu tilfelli hafi það verið alla vega.

„Það voru stór tímamót hjá mér fyrir sautján árum árum þegar ég lagði fíkniefna og áfengisneyslu á hilluna og hóf nýtt lf án slíkra stoðefna. Slíkt ferðalag leiðir mann alltaf lengra og lengra í sjálfskönnun þar sem maður finnur sífellt meiri frið."

En þótt efnistökin séu persónuleg segir Tolli inntak sýningarinnar á hinn bóginn samfélagslegt og pólitískt.

„Ég legg þessa yfirskrift inn í samfélagsumræðuna eins og hún er í dag því við þurfum á meiri frið að halda, jafnvel þótt menn greini á málefnalega. Þetta tilfinningalega stjórnleysi í þjóðfélaginu, gremjan og reiðin, virðist ekkert vera á undanhaldi heldur finna sér nýjan farveg.

Sú reiði sem reis upp í hruninu er í raun viðhaldið af þeim sem iðka stjórnmálin.Ég vil ekki endilega að menn skipti um skoðun í stjórnmálum, heldur vinnubrögð. Að menn losi sig undan karma fortíðarinnar, þessu oki að þurfa að ganga inn í gremju og reiði genginna kynslóða."