Vilja flytja sendiráð Norðurlanda á Íslandi undir sama þak

Utanríkisráðherrar Norðurlandanna telja æskilegt að flytja sendiráð Danmerkur, Svíþjóðar, Noregs og Finnlands á Íslandi í eitt og sama húsnæði.

Þetta kom fram á fundi utanríkisráðherra Norðurlandanna á þingi Norðurlandaráðs í Helsinki í morgun. Steingrímur J. Sigfússon, atvinnuvegaráðherra, sat fundinn í fjarveru Össurar Skarphéðinssonar sem er heima á Íslandi með flensu.

Norðurlöndin ætla að auka samvinnu sína við rekstur sendiráða enn frekar til að ná fram auknum sparnaði og styrkja diplómatísk tengsl. Í næsta mánuði verður sameiginleg sendiráðsskrifstofa opnuð í Rangoon í Búrma, en þar munu Danir, Norðmenn og Svíar deila aðstöðu. Þá ætla Norðmenn og Danir að deila sendiráðsskrifstofu í Islamabad í Pakistan sem á að opna á árinu 2014.

Þá eru í burðarliðnum áform um opnun sameiginlegrar skrifstofu Svía, Norðmanna og Finna í Hanoi í Víetnam árið 2016. Þá ætla Danir, Svíar og Norðmenn að deila skrifstofu í Dhaka í Bangladesh og á hún að opna 2015.

From kom á fundinum í Helsinki í dag að utanríkisráðherrar Norðurlandanna legðu ekki aðeins áherslu á að deila vinnuaðstöðu í þágu sparnaðar í þriðju ríkjum, heldur einnig á Norðurlöndunum sjálfum, en ráðherrarnir eru sammála um að sameiginleg sendiráðsskrifstofa í Reykjavík sé æskileg. Þar myndu Svíar, Danir, Norðmenn og Finnar deila vinnuaðstöðu. Engin ákvörðun hefur hins vegar verið tekin ennþá um hvort og hvenær þau áform verði að veruleika.