Fangar fá samkeppni - hægt að kaupa bílnúmer frá Túvalúeyjum

Fangar á Litla Hrauni hafa fengið óvænta samkeppni utan úr heimi. Það er nefnilega hægt að kaupa íslensk skráningarmerki á bifreiðar, eða bílnúmer, á vefnum licenseplate.tv. Þar má meira að það segja finna nokkrar útgáfur af íslenskum bílnúmerum sem fyrirtækið framleiðir. Ein þeirra er nokkuð lík skráningarmerkjum hér á landi, og hefur greinilega staðist skoðun fyrir árið 2010, allavega af myndinni að dæma.

Ekki er ljóst hvort fyrirtækið selur mikið af slíkum plötum til Íslands, en bifreiðaeigendum er auðvitað óheimilt að nota þær plötur hér á landi. Panta þarf skráningarmerki hjá Umferðastofu sem felur svo föngum á Litla Hrauni að smíða plöturnar.

Fyrirtækið býðst til þess að smíða númeraplötur fyrir nær öll Evrópulöndin og fleiri ríki að auki. Þess má geta að lénið tv tilheyrir Túvalúeyjum sem eru eyríki á eyjaklasa í Kyrrahafi, miðja vegu milli Ástralíu og Havaí.