Ráðherrar verða átta

Ráðherrum mun fækka niður í átta þegar Katrín Júlíusdóttir kemur úr fæðingarorlofi, sagði Jóhanna Sigurðardóttir forsætisráðherra þegar hún flutti skýrslu um störf og stefnu ríkisstjórnarinnar á þingfundi í dag. Jóhanna sagði ekkert um það hvaða ráðherra myndi víkja úr ríkisstjórninni þegar þar að kemur.

Eins og kunnugt er voru gerðar miklar breytingar á ríkisstjórninni við síðustu áramót og ráðherrum fækkað um tvo. Þetta er í annað skipti sem veigamiklar breytingar eru gerðar því að fyrir um ári síðar yfirgáfu Gylfi Magnússon efnahags- og viðskiptaráðherra og Ragna Árnadóttir dómsmálaráðherra ríkisstjórnina.

Þegar ríkisstjórnin tók við völdum voru ráðherrar 12 og því mun þeim hafa fækkað um þriðjung þegar allar breytingarnar eru um garð gengnar.