Guðrún tjáir sig ekki

Guðrún Pálsdóttir, bæjarstjóri í Kópavogi, segir að sér hafi ekki verið sagt formlega upp störfum og því sé ekki tímabært að tjá sig um málið við fjölmiðla að svo stöddu.

Guðríður Arnardóttir, oddviti Samfylkingarinnar í bæjarstjórn Kópavogs, sagði við Vísi fyrr í dag að meirihluti bæjarstjórnarinnar sé einhuga um brotthvarf Guðrúnar úr stóli bæjarstjóra. Guðríður vildi í dag ekki tjá sig um næsta bæjarstjóra í bænum en það myndi liggja fyrir að hann verður pólitískur.

Guðrún var ráðin eftir síðustu kosningar sem ópólitískur bæjarstjóri en hún vann áður sem sviðsstjóri menningarsviðs bæjarins auk þess sem hún var fjármálastjóri til 20 ára.