Sameiningatillögur alveg víðs fjarri

Sparnaður af sameiningu reykvískra grunnskóla hljóðar upp á tæpar tólf milljónir fyrir árið 2012, eða núll komma núll sex prósent af rekstri grunnskólanna. Varla ómaksins virði að hafa lagt upp í þessa vegferð, segir borgarfulltrúi.

Júlíus Vífill Ingvarsson, borgarfulltrúi, fékk nýverið svör við fyrirspurn sem hann sendi fjármálastjóra skóla og frístundarsviðs en þar óskaði hann meðal annars eftir upplýsingum um heildarsparnað af sameiningu grunnskóla og leikskóla.

„Ég þekki það frá því ég var formaður menntaráðs að það að reka skóla saman, eða sameiginlega, hefur hverfandi áhrif fjárhagslega. Það er nánast engin sparnaður í slíku og nú hefur það verið staðfest," segir Júlíus Vífill.

Hagræðing á árinu 2012 vegna sameininga leikskóla hljóðar upp á 60 milljónir króna en sparnaður vegna sameininga grunnskóla er mun minni. Þá sé sparnaður í grunnskólum tæpar 12 milljónir króna.

Þetta segir hann samsvara 0,06% af rekstri grunnskólanna.

„Svo ég noti nú orð borgarstjórans sjálfs, sem sagði að það væri ekki ómaksins virði að moka göturnar þegar fólk var að detta hér út um alla borg, þá getur það nú varla talið ómaksins virði að hafa lagt út í þessa vegferð með þessa niðurstöðu fyrir grunnskólana í Reykjavík," segir hann.

Sparnaður á Skóla og frístundasviði í heildina þ.e. vegna sameiningar frístundaheimila, leikskóla og grunnskóla eru 93 milljónir eða 0,3% af heildarrekstri sviðsins.

„Það var lagt upp með það að þessar sameiningatillögur myndi skila 312 milljóna króna sparnaði og nú er ljóst að það er alveg víðs víðs fjarri," segir Júlíus Vífill.