"Guðríður talar þvert ofan í sannleikann"

Ármann Kr. Ólafsson, oddviti Sjálfstæðisflokksins í Kópavogi, segir að meirihluti bæjarstjórnar standi á brauðfótum og mikill trúnaðarbrestur hafi átt sér stað eftir að fréttir bárust af því að Guðrúnu Pálsdóttur, bæjarstjóra hafi verið sagt upp störfum.

Fulltrúar Sjálfstæðisflokksins í Kópavogi hafa óskað eftir að haldinn verði aukafundur í bæjarráði á morgun. Með fundarboðinu vona fulltrúar Sjálfstæðisflokksins að gefin verði svör fyrir því hvers vegna Guðrúnu hafi verið vikið úr bæjarstjórastólnum. Samkvæmt heimildum fréttastofu verður Guðrúnu tilkynnt um uppsögn sína formlega á morgun, en hún vill ekki tjá sig um uppsögnina fyrr en henni hefur verið sagt upp formlega.

Ármann Kr. segir í samtali við Vísi stjórnsýslu meirihlutans vera dæmalausa og gagnrýnir starfshætti Guðríðar Arnardóttur, formanns bæjarráðs. Hann segir það vera forkastanlegt að sitjandi bæjarstjóra hafi verið vikið úr starfi óformlega og að engar útskýringar hafi verið gefnar fyrir því. Að auki hafi ákvörðunin verið tekin nokkrum dögum áður en reglubundinn bæjarráðsfundur átti að eiga sér stað.

Í fréttum Stöðvar 2 í kvöld sagði Guðríður að meirihlutinn í bænum standi traustum fótum. „Þarna er manneskja að tala þvert ofan í sannleikann, það sjá það allir," segir Ármann.

Hann veltir því fyrir sér hvort að nýr bæjarstjóri geti starfað með meirihlutanum. „Það er alveg ótrúlegt hversu lítið bakland núverandi bæjarstjóri hefur haft í meirihlutanum. Það verður klárlega umhugsunarefni fyrir þann sem tekur við bæjarstjórastóli hvort að mögulegt sé að starfa með slíku fólki."