Útlit fyrir stærstu loðnuvertíð í áratug

Hafrannsóknastofnunin leggur til að leyfilegur hámarksafli á loðnuvertíðinni verði 765 þúsund tonn, að meðtöldum þeim afla sem búið var að veiða þegar mælingar fóru fram. Um 590 þúsund tonn af loðnu munu falla til íslenskra útgerða. Útflutningsverðmætið er um 30 milljarðar króna, segir á heimasíðu LÍÚ.

Í janúar hefur rannsóknaskipið Árni Friðriksson verið við rannsóknir og mælingar á stærð loðnustofnsins frá sunnanverðum Austfjörðum, norður um og allt að Norðvesturmiðum. Fyrstu dagana komu jafnframt 11 veiðiskip að því að kanna útbreiðslu loðnunnar út af Austfjörðum og Norðurlandi. Útreikningar á stærð veiðistofnsins sýna að alls mældust 1.065 þúsund tonn af kynþroska loðnu í fyrri mælingunni, en 1.020 þúsund tonn í þeirri síðari.

Í ljósi gildandi aflareglu um að skilja 400 þúsund tonn eftir til hrygningar hefur Hafrannsóknastofnunin nú lagt til að leyfilegur hámarksafli á vertíðinni 2011/2012 verði ákveðinn 765 þúsund tonn, eins og áður sagði.

Jóhann Sigurjónsson, forstjóri Hafrannsóknastofnunar, segir fréttirnar afar ánægjulegar enda verði loðnuvertíðin í ár sú stærsta í um áratug og gefi góðar vonir um framhaldið. Hann segir þetta ekki síður mikilvægt fyrir lífríkið í hafinu vegna fæðuöflunar annarra nytjastofna.

- shá