Þingmenn gistu í flugrútu

„Ísland stóð svo sannarlega undir nafni þegar það tók á móti okkur,“ segir Siv Friðleifsdóttir alþingismaður sem lenti í hrakningum ásamt fleiri þingmönnum við komuna til landsins í fyrrakvöld.

Með Siv í för voru Álfheiður Ingadóttir, Bjarni Benediktsson, Helgi Hjörvar, Jón Gunnarsson og Lúðvík Geirsson. Auk þeirra voru síðan nokkrir starfsmenn þingsins í föruneytinu sem var að skila sér heim frá Ósló að loknum fundum hjá Norðurlandaráði. Þingmaðurinn Höskuldur Þórhallsson kom einnig til landsins í fyrrakvöld annars staðar frá.

Siv segir hópinn hafa verið fastan í flugrútunni hér og þar í og við Keflavík áður en leikurinn barst aftur upp í Leifsstöð eftir um tvo klukkutíma. Jón Gunnarsson hafi þó verið fljótur í gegn um flugstöðina og náð að fara Reykjanesbrautina á eigin bíl rétt í þann mund sem veginum var lokað.

„Við gátum brotist upp í flugstöð aftur og þar hófst bið. Sumir komu sér síðan á hótel í Keflavík eða til vina og vandamanna,“ segir Siv sem eins og Álfheiður Ingadóttir og Bjarni Benediktsson gisti á Hótel Keflavík.

Siv segir að þótt mannskapurinn hafi tekið öllu af æðruleysi hafi sumir ferðamennirnir ekki vitað hvaðan á þá stóð veðrið. „Einn hélt víst að hann væri að koma til Reykjavíkur þegar við vorum að koma upp í flugstöð aftur,“ segir Siv sem hrósar bílstjóra rútunnar fyrir mikla færni í blindhríð og ófærð.

Lúðvík Geirsson segir að það hafi einmitt verið umhyggjusamur rútubílstjóri Kynnisferða sem bauð farþegunum sínum að láta fara þokkalega um sig í heitri rútunni í stað þess að hírast í flugstöðinni. Hann og Helgi Hjörvar ásamt tveimur starfsmönnum Alþingis hafi náð að dotta þar til morguns. Hann furðar sig hversu lítill viðbúnaður sé vegna tilviks eins og þessa þegar fjöldi manna verður innlyksa í flugstöðinni. Fólk þar hafi þó fengið vatn og teppi um miðja nótt.

„Mér þótti sárt og aumt að horfa upp á þetta gagnvart mörgu fólki sem var með börn og gat litla björg sér veitt. Fólk lá bara á beru steingólfinu út um alla flugstöð. Ég kvarta ekki en nóttin var erfið hjá mörgum,“ segir Lúðvík Geirsson.

gar@frettabladid.is