Þvinga á fram gögn um brjóstastækkanir

Velferðarráðherra mun beita sér fyrir lagabreytingum til að krefja lýtalækna um að afhenda landlæknisembættinu upplýsingar, leysist málin ekki á næstunni. Hópur lýtalækna neitar landlækni enn um upplýsingar varðandi brjóstastækkanir sem þeir hafa gert á sjúklingum sínum frá árinu 2000. Þeir hafa leitað með málið til Persónuverndar. Guðbjartur Hannesson velferðarráðherra segir afstöðu sína í málinu afar skýra.

„Ef við ætlum að hafa eftirlit með því hvað fagfólk með lögvarin starfsréttindi er að gera við líkama fólks, án þess að vera hluti af hinu opinbera heilbrigðiskerfi og skilmálunum þar, þá virkar þetta kerfi aldrei,“ segir hann. „Það getur ekki verið svo að við megum vita minna um mannslíkamann heldur en bílana okkar ef fréttist af gallaðri vöru. Við munum því skoða þetta mjög alvarlega og ef þar vantar lagastoð til að fylgja því eftir, þá þarf að skoða hvernig við getum breytt þeim lögum.“

Guðbjartur segir það algerlega óhugsandi að heilbrigðisyfirvöld geti ekki gripið til tafarlausra aðgerða með fullum stuðningi lækna til að vernda íbúa landsins þegar mál eins og það í kringum PIP-púðana koma upp.

„Því þetta eru ekki bara fyrirtæki, þetta eru menn sem starfa undir læknaeiði og eru með réttindi umfram alla aðra til að sinna ákveðnum verkum,“ segir hann. „Það er eins gott að þeir standi undir því og ég treysti á að þeir muni gera það.“

Tveir lýtalæknar af þeim tólf sem landlæknir krafði um upplýsingar fyrir lok síðustu viku, hafa skilað inn gögnum. Að sögn Geirs Gunnlaugssonar landlæknis eru þau gögn þó „ekki fullkomin“.

Hann er ekki sammála túlkun læknanna, sem telja að trúnaður milli læknis og sjúklings vegi þyngra en réttur landlæknisembættisins til upplýsinga til að sinna eftirlitsskyldu sinni. „Við erum að vinna í því að grípa til aðgerða til að fá þessar upplýsingar og munum skilgreina ferlið mjög vel,“ segir hann. „Allar upplýsingar um heilbrigðisþjónustu á landinu eiga að vera aðgengilegar á hverjum tíma til að vita hvað fer fram í heilbrigðiskerfinu og það er fjöldi lækna sem styður okkur í þeirri afstöðu. Við munum fá niðurstöðu í þessu máli.“

Ekki náðist í Ottó Guðjónsson, formann Félags lýtalækna.

sunna@frettabladid.is