Rýmt vegna snjóflóðahættu á Ísafirði

Lögreglustjórinn á Ísafirði í samráði við Veðurstofu Íslands hefur ákveðið að láta rýma svæði undir Seljalandshlíð á Ísafirði (reitur 9) vegna snjóflóðahættu.

Einnig bæina Hraun í Hnífsdal (reitur 8) og Höfða við Kirkjubólshlíð.

Fyrr í dag barst einnig tilkynning frá Almannavörnum um að lýsa yfir óvissustigi vegna snjóflóðahættu á norðanverðum Vestfjörðum.

Veðurstofan segir að búast megi við vatnavöxtum á láglendi sunnan- og vestanlands vegna hláku og úrkomu á laugardagskvöld og sunnudag.

Á Vestfjörðum er vegur lokaður innan við Patreksfjörð vegna snjóflóðahættu og Kleifaheiði er ófær samkvæmt upplýsingum frá Vegagerðinni. 

Ófært er milli Patreksfjarðar og Bíldudals og eins frá Vatnsfirði og austur yfir Klettsháls. Flughált er í Gufudalssveit og á Innstrandavegi.