Íslenska teiknimyndin Hetjur Valhallar - Þór var frumsýnd í Suður- Kóreu fyrir helgina og hafa móttökurnar verið „hreint út sagt æðislegar," að sögn aðstandenda. „Myndin varð vinsælasta erlenda myndin í kvikmyndahúsum Suður-Kóreu þessa helgina og sló út ekki slakari myndir en Star Wars í þrívídd, War Horse, Tinker Tailor Soldier Spy og Happy Feet 2."
Þá segir að myndin hafi strax fyrstu helgina næstum tvöfaldað aðsóknartölur teiknimyndarinnar Happy Feet 2 þrátt fyrir að sú síðarnefnda hafi verið í sýningu í tvær vikur. Heildarvelta helgarinnar hljóðar þannig upp á tæpar 180 milljónir íslenskra króna.
Framleiðslufyrirtækið CAOZ framleiðir Hetjur Valhallar - Þór sem frumsýnd var á Íslandi þann 14. október síðastliðinn. Myndin hefur verið seld til um 60 landa og er Suður-Kórea fyrsta landið utan Íslands sem tekur myndina til sýninga og af viðbrögðunum að marka þá er framtíðin björt fyrir Þór, Mjölni og félaga.
Þór og Mjölnir slá í gegn í Kóreu
