Brautskráðir doktorar tóku við gullmerki Háskóla Íslands

Fjörutíu og þrír doktorar, sem varið hafa ritgerðir sínar við Háskóla Íslands síðastliðið ár, tóku við gullmerki háskólans á hátíð brautskráðra doktora sem fram fór í Hátíðasal Aðalbyggingar í gær.

Ólafur Ragnar Grímsson, forseti Íslands, og Katrín Jakobsdóttir mennta- og menningarmálaráðherra voru viðstödd athöfnina og ávörpuðu þau nýdoktorana í tilefni dagsins.

Vegur doktorsnáms innan Háskóla Íslands hefur aukist ört á síðustu 20 árum og heldur stefna skólans frá árinu 2011 áfram á svipuðum nótum.

Eru doktorsnemar við háskólann nú rúmlega 470 talsins. Tekjur Háskóla Íslands úr erlendum sjóðum, sem tengjast alfarið vísindarannsóknum, jukust um 70% frá 2008 til 2011 og námu rúmlega 1100 milljónum í fyrra.

Með áherslu á doktorsnám hefur skólinn aukið tengsl við atvinnulífið með nýjum hætti en áætlað er að í heildina séu um 750 ársverk í framhaldsnámi við skólann, í meistara- og doktorsnámi.

Doktorsnemar eru iðulega þátttakendur í nýsköpunarverkefnum innan öflugra fyrirtækja og leggja mikið til vöruþróunar.