Ræninginn af erlendu bergi brotinn

Það var klukkan hálf tólf á föstudagskvöldið sem að karlmaður vopnaður byssu réðst inn í söluturn við Grundarstíginn. Ræninginn ógnaði rúmlega tvítugum afgreiðslumanni með byssu. Talið er að ræninginn hafi haft á brott með sér um 30 þúsund krónur. Ræninginn hljóp svo út og niður Skálholtsstíg og hringdi þá afgreiðslumaðurinn strax á lögreglu sem var mætt innan nokkurra mínútna.

Lögregla telur víst að hleypt hafi verið af skotvopni og fann ummerki um það á staðnum. Hins vegar er enn óljóst um hvers konar skotvopn var að ræða. Eigandi söluturnsins sagði í samtali við fréttastofu að afgreiðslumaðurinn teldi ræningjann af erlendum uppruna þar sem hann hótaði honum á bjagaðri ensku.

Samkvæmt upplýsingum frá lögreglunni í morgun er rængingjans enn leitað, engar ábendingar hafa borist og ekki er vitað hver ræninginn er. Fréttastofa hefur þó heimildir fyrir því að leitað sé að ákveðnum manni í tengslum við málið.