Saumaklúbbur sem spilar Stones

„Það er ekki á hverjum degi sem forfeðurnir verða fimmtugir,“ segir Bjarni Sigurðsson gítarleikari hljómsveitarinnar Stóns. Bandið hefur undanfarin þrjú ár spilað lög hetjanna í Rollings Stones.

Í ár eru fimmtíu ár frá stofnun Rollings Stones og í tilefni þess halda þeir sérstaka afmælistónleika á Gauki á stöng annað kvöld klukkan ellefu. „Þetta verður nærri þriggja tíma prógramm og við spilum svona tæplega þrjátíu lög. Ég held að engin sveit hafi gefið út fleiri smáskífur og slagara og Stones svo það er úr nógu að velja,“ segir Bjarni.

Upphaf hljómsveitarinnar má rekja til tónleikaferðar hljómsveitarinnar Mínus. „Ég var með Rolling Stones í „headphones“ í tónleikarútunni og Bjössi var dansandi og þá sá ég bara allt í einu Mick Jagger birtast. Á svipuðum tíma fann ég alveg eins gítar og Keith Richards átti og þetta vatt upp á sig,“ segir Bjarni. „Þetta er svona saumaklúbburinn okkar. Við erum allir forfallnir Rolling Stones aðdáendur. Í stað þess að hittast og spila póker spilum við Stóns.“