Gull og silfur í dansi

Íslenskt danspar gerði það gott í Svíþjóð um helgina

Íslenska dansparið Brynjar Björnsson og Perla Steinsgrímsdóttir kom heim frá Svíþjóð með gull og silfurpening í farteskinu eftir helgina.

Þau kepptu þar á Norður Evrópumótinu í Suður-Amerískum dönsum á laugardaginn og lentu í öðru sæti í flokki fjórtán til fimmtán ára en 25 keppendur voru skráðir til leiks.. Á sunnudaginn gerðu þau gott betur og sigruðu í opinni keppni í aldursflokknum sextán til átján ára en þar voru 40 þátttakendur allstaðar að úr Evrópu sem stigu á gólf. Bæði eru þau Brynjar og Perla fimmtán ára gömul en fengu undanþágu til að keppa með sér eldri krökkum í þeirri keppni þar sem ekki var boðið upp á opna keppni fyrir þeirra aldurhóp.

Brynjar og Perla hafa aðeins dansað saman í fjóra mánuði en hafa bæði unnið fjöldan allan af meistaratitlum í dansi með öðrum félögum. Bæði eiga þau til að mynda nokkra Íslandsmeistaratitla á bakinu.- trs