Ætti að vera á hverju ári

„Við myndum aldrei læra ensku ef allt væri talsett,“ var meðal þess sem kom fram á málræktarþingi tíundu bekkinga úr Laugalækjarskóla, Langholtsskóla og Réttarholtsskóla, sem komu saman til þings í tilefni af degi íslenskrar tungu í gærmorgun. Fæstum leist vel á þá hugmynd að allt sjónvarpsefni hér á landi væri talsett.

Krakkarnir hafa undanfarið unnið verkefni um gildi íslenskrar tungu og héldu fundi í skólanum um ýmislegt sem við kemur tungumálinu. Afraksturinn mátti sjá á þinginu í gærmorgun. Allir skólarnir sýndu myndband eða myndbönd og nemendur í Langholtsskóla sungu einnig tvö lög til að sýna fram á gildi íslenskunnar.

Meðal þess sem var rætt var hvort rétt væri að leggja niður y til að einfalda málin. Þá komu fram mjög misjafnar skoðanir á störfum mannanafnanefndar og því að útlendingar hefðu áður fyrr þurft að taka upp íslensk nöfn til að fá íslenskan ríkisborgararétt. Sumir voru alfarið á móti því að mannanafnanefnd væri starfandi hér á landi en aðrir töldu mögulegt að börn yrðu lögð í einelti ef þau hétu of skrítnum nöfnum.

Katrín Jakobsdóttir, mennta- og menningarmálaráðherra, minnti unglingana á að íslensk tunga væri menningarverðmæti. „Íslenskan stýrir því að einhverju leyti hvernig við hugsum, þannig að ef við hættum að tala íslensku breytist líka hvernig við hugsum og þá fer heimurinn svo margs á mis,“ sagði Katrín. Hún benti á velgengni íslenskra tónlistarmanna, kvikmynda, bóka og annarrar menningar og sagði mikilvægt að kunna góða íslensku til að starfa í skapandi greinum.

„Stóra málið til að viðhalda íslenskunni er að horfa ekki bara á hana sem eitthvað sem á að varðveita heldur eitthvað sem á að vinna með, þess vegna fannst mér gaman að heyra ykkur tala um hana.“

thorunn@frettabladid.is