Safna aðdáendum Instagram saman á Kex

"Okkur finnst mjög gaman að hann hafi valið okkur sem vettvang fyrir þennan viðburð enda er Rise virtur innan Instagram-samfélagsins," segir Guðmundur Magnússon, móttökustjóri Kex Hostel, en ljósmyndarinn og hönnuður Instagram-lógósins, Cole Rise, hefur boðað til svokallaðs Instagram Meetup á Kex Hostel á sunnudaginn.

Instagram Meetup er þekkt fyrirbæri úti í heimi, en þetta er í fyrsta sinn sem viðburður á borð við þennan fer fram hér á landi. Um er að ræða vettvang þar sem aðdáendur og áhugafólk um samfélagsmiðilinn hittast, bera saman bækur sínar og fá óformlega fræðslu um Instagram. "Þetta er mjög þekkt úti í heimi. Þetta er ekki fundur þar sem Rise heldur fyrirlestur, heldur frekar hittingur þar sem notendur Instagram geta hist og deilt áhugamáli sínu með fleirum," segir Guðmundur. Instagram Meetups hafa verið haldnir í yfir 1300 borgum út um allan heim.

Rise hannaði Instagram-lógóið, sem er orðið þekkt vörumerki, ásamt því að hanna nokkrar af litsíunum (e. filter) sem eru í boði fyrir notendur miðilsins. Rise sérhæfir sig í að taka myndir á símann sinn og getur því miðlað af visku sinni varðandi myndatökur, litsíur og annað sem tengist Instagram. Guðmundur segir hittinginn vera fyrir alla þá sem hafa áhuga á miðlinum, en hann ætlar sjálfur ekki að láta sig vanta.

"Hér á Kex höfum við mjög góða reynslu af þessum miðli, en við notum Instagram mjög mikið til að koma okkar skilaboðum áleiðis. Það var einmitt í gegnum Instagram sem Rise frétti af okkur. Það er því um að gera fyrir fyrirtæki jafnt sem einstaklinga að mæta og fá fræðslu um hvaða möguleikar eru í boði innan Instagram."

Fundurinn hefst klukkan 17 á sunnudaginn en hægt er að fræðast um Instagram Meetups á vefsíðunni Meetup.com/instagram. Einnig er hægt skoða símamyndir Rise á vefsíðunni Life.colerise.com.

Um Instagram

Instagram er ljósmyndaþjónusta og samfélagsmiðill sem var stofnaður í október 2010. Gengur út á að taka myndir, einna helst á síma, setja einhverskonar filter á hana og deila með fylgjendum sínum á forritinu.

Einnig er hægt að deila myndinni á öðrum samfélagsmiðlum á borð við Facebook og Twitter. Skráðir notendur eru 100 milljónir. Fyrst stofnað fyrir iPhone, iPad og iPod Touch. Frá því í apríl 2012 hefur þjónustan verið í boði fyrir eigendur Android síma.

Býður upp á 14 mismunandi litsíur (e.filter) fyrir myndir. Tölfræði tekin saman í maí 2012: 58 myndir hlaðast inn á miðilinn á hverri sekúndu. Á hverri sekúndu bætist nýr notandi við. Meira en ein billjón myndir eru inni á Instagram- miðlinum. Facebook keypti Instagram fyrr á þessu ári fyrir um 1 billjón bandaríkjadala í peningum og hlutbréfum. Nýlega var gerð sú breyting að hver notandi Instagram er nú með sína eigin síðu á netinu þar sem hægt er að nálgast allar myndir hans.