Þátttökubekkir ekki komnir á áætlun

Svokallaðir þátttökubekkir fyrir þroskahamlaða sem menntaráð Reykjavíkurborgar samþykkti í janúar í fyrra að komið yrði á fót eru enn ekki komnir í framkvæmd. Klettaskóli er valkostur fyrir börn með sérþarfir. Þátttökubekkir yrðu millistig milli Klettaskóla og almennra skóla og í umsjón Klettaskóla.

"Mjög líklega yrði markhópurinn börn sem gætu bæði verið í Klettaskóla og almennum grunnskólum," segir Ragnar Þorsteinsson, sviðsstjóri skóla- og frístundasviðs Reykjavíkur.

Þó stefnt hafi verið að því að þátttökubekkir væru komnir í gagnið haustið 2013 og að þeir séu inni í ný endurskoðaðri stefnu borgarinnar um skóla án aðgreiningar bendir Ragnar á að fjárhagsáætlun borgarinnar fyrir næsta ár verði ekki ljós fyrr en í næsta mánuði. Því sé enn óvíst hvort bekkirnir komist í gagnið á næsta ári.

Þegar endurskoðun stefnunnar var samþykkt samhljóða í skóla- og frístundaráði á miðvikudag sögðu fulltrúar Sjálfstæðisflokksins núverandi framkvæmd stefnunnar umdeilda. "Meðal annars hefur verið bent á að foreldrar, sem telja að sérskóli henti börnum þeirra betur en heimaskóli, eigi ekki kost á raunverulegu vali milli þessara tveggja kosta," sagði í bókun þeirra.

"Þetta gæti verið valkostur fyrir þau," svarar Ragnar aðspurður hvort þátttökubekkirnir standi til boða þroskahömluðum börnum sem í dag falla milli skips og bryggju að því leytinu til að finna sig ekki í almennum skóla en uppfylla ekki inntökuskilyrði í Klettaskóla. "Inntökureglur fyrir þessa þátttökubekki hafa ekki verið mótaðar enn. Það gætu orðið önnur inntökuskilyrði en í Klettaskóla," segir sviðsstjórinn. - gar