Raðirnar í símann

Miðbær Reykjavíkur er undirlagður Airwaves-tónleikahátíðinni þessa dagana, en hún hófst í gær og stendur yfir fram á sunnudagskvöld. Snjallsímaeigendur sem ætla sér að sækja hátíðina hafa á síðustu dögum margir sótt sér Airwaves-appið í símann sinn. Í appinu er meðal annars að finna svokallaða biðraðamyndavél þar sem streymt er í beinni útsendingu myndbandsupptökum á röðunum fyrir utan helstu tónleikastaðina. Þannig geta hátíðargestir fylgst með stöðu mála á öðrum stöðum og hagað málum sínum þannig að þeir losni við að eyða kvöldinu í að standa í röðum.

Airwaves-appið býður upp á fleiri möguleika, jafnvel fyrir þá sem ekki eiga miða á hátíðina. Þar er hægt að kynna sér bæði þá tónleika sem eru á hátíðinni og líka þá sem eru utandagskrár og öllum opnir, en yfir 700 tónleikar eru í boði þá fimm daga sem hátíðin stendur yfir. Hátíðargestir geta einnig raðað saman sinni persónulegu dagskrá í appinu og þannig haft allar upplýsingar á hreinu áður en haldið er af stað.