Þrjár raddir komu fram fyrir milljón Norðmenn

Beat for Beat er skemmtiþáttur sem sýndur er í norska ríkissjónvarpinu og er það Ivar Dyrhaug sem stýrir þættinum ásamt tónlistarmönnunum Gisle Børge Styve og Trond Nagell Dahl. Þátturinn nýtur mikilla vinsælda í Noregi og að sögn Söndru horfir um milljón manns á hann hvert föstudagskvöld. Ásamt því að keppa í þættinum tók sveitin einnig eitt lag fyrir áhorfendur. Spurð um úrslitin segir Sandra hlæjandi: „Að sjálfsögðu unnum við.“

Hún vonar að þátttökunni fylgi aukið umtal og fleiri verkefni fyrir sönghópinn. „Hérna ganga hlutirnir ekki eins fyrir sig og heima, hér er mjög erfitt að fá umfjöllun ef þú ert ekki frægur. En við vonum að þátttakan í Beat for Beat muni leiða til stærri og fleiri verkefna. Við höfum þegar fengið nokkrar fyrirspurnir í tölvupósti eftir þáttinn sem er æðislegt.“

Hópurinn hefur haft í nógu að snúast síðan hann flutti til Noregs fyrir tveimur árum. „Við erum ævintýragjörn og okkur langaði að prófa eitthvað nýtt. Fyrst bjuggum við öll í einu herbergi sem við leigðum á 240 þúsund krónur, borðuðum túnfisk í öll mál og vorum næstum búin að drepa hvert annað. Núna búum við hvert í sinni íbúð og það er mun betra,“ segir hún og hlær.

Spurð út í önnur verkefni söngsveitarinnar segir Sandra þau vinna að uppsetningu leiksýningar sem sýnd verður í Óperuhúsinu í Ósló í mars. „Leikstjóri sýningarinnar vildi endilega fá okkur með sér í lið. Sýningin fjallar um útgáfufyrirtækið Motown og við erum núna í því að útsetja lög fyrir sýninguna.“ sara@frettabladid.is.