Valdi fjölskylduna í stað Jólagesta Björgvins

„Fjölskyldan gengur stundum fyrir vinnunni en það er alltof sjaldan. Mér fyndist að það þyrfti að vera alltaf,“ segir Egill Ólafsson.

Söngvarinn er hættur við að koma fram á Jólagestum Björgvins Halldórssonar í Laugardalshöll vegna þess að sonur hans, dansarinn Gunnlaugur Egilsson, er að frumsýna verk í Stokkhólmi á sama tíma. „Maður getur ekki verið á tveimur stöðum í senn,“ segir Egill. Hann hafði fyrir löngu ákveðið að sjá verkið og þegar tímasetningu frumsýningarinnar var breytt varð að hann að afboða sig hjá Björgvini. „Það verður einvala lið þarna og það munar ekki um þótt eitt lítið tannhjól detti út.“

Egill hefur einu sinni áður sungið á Jólagestunum og hafði mjög gaman af. „Sumir miða við að jólin hefjist með Bó. Þetta var mjög hátíðlegt þegar ég var þarna og ég sendi mína sterkustu strauma í fjarveru minni.“

Björgvini sjálfum þykir leitt að njóta ekki lengur krafta Egils. „Það er mjög vont að missa Egil. Hann var kominn með svo flott prógramm þarna inn en svona er þetta bara. En við erum með fullt af frábærum listamönnum og þarna verða svaka fallbyssur,“ segir Björgvin og nefnir til sögunnar nýja söngvara Jólagesta, þau Eirík Hauksson, Bubba Morthens, Valdimar og Þórunni Antoníu. Hann bætir við að þrír söngvarar stígi á svið í stað Egils, eða Kristjana Stefánsdóttir, Dísa og sonur hans Krummi. „Við höldum ótrauð áfram og vonum að fólk skemmti sér vel fimmtánda desember.“