Kvenhetja í Transformers

Aðalpersónan í næstu Transformers-mynd, sem verður númer fjögur í röðinni og leikstýrt af Michael Bay, verður kvenkyns ef marka má sjóðheitar slúðursögur frá Hollywood. Lítið hefur verið um bitastæð hlutverk fyrir leikkonur í myndunum hingað til, en meðal kvenna sem komið hafa fram í aukahlutverkum eru Megan Fox og Rosie Huntington-Whiteley.

Leikarinn Shia LaBeouf hætti við þátttöku í myndinni fyrir nokkrum mánuðum og leitar leikstjórinn nú að leikkonu í aðalhlutverkið. Samkvæmt slúðrinu verður aðalpersónan menntaskólanemi og unnusti hennar verður ökuþór frá Texas. Bay hefur látið hafa eftir sér að þessi fjórða Transformers-mynd verði sú síðasta af hans hálfu, en frumsýning er áætluð næsta vor.