Sveitarstjórnarmenn rólegir yfir snjóflóðavarnargörðum

Sveitarstjórnarmenn bæjarfélaga þar sem framkvæmdir við snjóflóðavarnir eru í kortunum sýna töfum fullan skilning. Allir bera Ofanflóðanefnd vel söguna. Yfir tugur milljarða fer í varnir á næstu árum.

Siglfirðingar bíða nú eftir samþykki ríkisstjórnar fyrir áframhaldandi framkvæmdum við snjóflóðavarnir. Ingvar Erlingsson, forseti bæjarstjórnar í Fjallabyggð, segir að þrátt fyrir miklar framkvæmdir undanfarin misseri sé töluvert verk óunnið.

„Í haust byrja framkvæmdir við vegarlagningu upp að svæðinu. Þvergarðarnir eru búnir, en það á eftir að fá grænt ljós vegna stoðvirkja, sem eru grunnur þessara varna,“ segir hann. Áætlaður kostnaður Ofanflóðasjóðs vegna Siglufjarðar er talinn hlaupa á tveimur milljörðum króna.

Magnús Jóhannesson, formaður ofanflóðanefndar, telur mjög góðar líkur á því að frekari framkvæmdir við Siglufjörð geti hafist á næsta ári.

„Það er enn verið að vinna að kostnaðarmati á verkinu sem verður svo boðið út, enda stórt,“ segir Magnús, en gert er ráð fyrir að framkvæmdir taki tvö til þrjú ár.

Fram kemur í fjárlögum þessa árs að óskað hafi verið eftir tímabundnu framlagi til verkefna við snjóflóðavarnir á Ísafirði og Patreksfirði. Áætlaður kostnaður við þessar tvær framkvæmdir er um einn milljarður króna. Gert er ráð fyrir að sú vinna samsvari um 70 ársverkum.

Ofanflóðasjóður hefur yfir að ráða um 10,3 milljörðum króna, eins og fram kom í Fréttablaðinu í gær. Til stendur að ljúka við uppbyggingu snjóflóðavarnargarða í sjö bæjarfélögum fyrir árið 2020, en upphaflegu áætluninni hefur seinkað um tíu ár. Þegar framkvæmdum lýkur verða snjóflóðagarðar í hlíðunum fyrir ofan tólf bæi og þorp víðs vegar á landinu.

Svandís Svavarsdóttir umhverfisráðherra segir allt útlit fyrir að greiðari framgangur verkefna muni hefjast árið 2013 miðað við þær tillögur sem fram hafa komið fyrir næstu fjárlög.

Hlutverk ofanflóðanefndar er að ráðstafa fé úr Ofanflóðasjóði og taka afstöðu til tillagna sveitarstjórna um varnarvirki fyrir hættusvæði sem þegar hafa verið byggð og um kaup eða flutning húseigna í stað þess að reisa varnarvirki eða beita öðrum varnaraðgerðum vegna ofanflóða.

sunna@frettabladid.is