Greniskógi rutt burt vegna snjóflóðagarða

„Ef þetta nær fram að ganga mun þetta verða eitt versta umhverfisslys Íslandssögunnar og þar með afskræming á okkar fallega þorpi,“ segir Jónas Þór, íbúi á Patreksfirði, um fyrirhugaðar framkvæmdir við snjóflóðagarða ofan sjúkrahúss og grunnskóla bæjarins.

Ofanflóðasjóður ákvað að láta reisa garðana eftir að snjóflóðahættan þarna var metin fyrir nokkrum árum. Til stendur að hefja framkvæmdir í sumar.

Jónas hefur skrifað Svandísi Svavarsdóttur umhverfisráðherra bréf vegna málsins. Hann gagnrýnir fyrirhugaðar framkvæmdir harðlega og segir fáránlegt að Umhverfisstofnun hafi ekki séð ástæðu til þess að fara í umhverfismat áður en þær voru samþykktar. Jónas segir umhverfisspjöllin sem garðarnir munu valda gífurleg, en meðal annars þarf að ryðja burt þéttum skógi sem starfsmenn sjúkrahússins hafa ræktað í hlíðinni síðan árið 1950.

„Það hefur aldrei fallið snjóflóð í hlíðinni á sögulegum tíma. Hún er bara þannig að þar festir aldrei snjó,“ segir hann.

Ásthildur Sturludóttir, bæjarstjóri Vesturbyggðar, segir ákvörðunina algjörlega í höndum ríkisvaldsins og byggða á hættumati frá ofanflóðavörnum.

Hún segir að vísað sé til verstu aðstæðna sem orðið geti og málið ekki í höndum bæjarins. „Hver vill taka þá ákvörðun um að fara ekki í ofanflóðavarnir þegar flóð fellur svo á sjúkrahúsið og grunnskólann? Persónulega finnst mér veik rök að verja einhverjar hríslur. Þetta er áhætta sem við getum ekki tekið,“ segir Ásthildur.

Úlfar Thoroddsen, forstjóri Sjúkrahússins á Patreksfirði, segir skóginn vera mestu eftirsjána, en það verði svo að vera. Framkvæmdir vegna snjóflóðagarða hafi legið fyrir þegar hann var í sveitarstjórn á árunum 2006 til 2010.

„Umhverfisspjöll fylgja öllum svona görðum,“ segir hann. „Húsin standa svo nálægt fjallinu að nauðsynlegt er að verja þau. Við því er ekkert að segja.“ sunna@frettabladid.is