200 manns keppa í skák í Hörpu

Reykjavíkurskákmótið hefst í Hörpu í dag og stendur í viku.

Um tvö hundruð keppendur frá um 40 löndum eru skráðir til leiks á mótinu og hafa aldrei fleiri tekið þátt. Meðal þeirra sem taka þátt eru Fabiano Caruana, sem er kominn í sjöunda sæti heimslistans í skák þrátt fyrir að vera aðeins nítján ára gamall. Hann er stigahæsti skákmaður sem hefur teflt á Reykjavíkurmótinu. Næststigahæsti skákmaðurinn á mótinu er Tékkinn David Navara.

Umgjörðin á mótinu verður hin glæsilegasta. Góð aðstaða verður fyrir áhorfendur, sem munu geta fylgst með skákum meistaranna á risaskjá. Þá munu stórmeistararnir Jóhann Hjartarson, Jón L. Árnason og Helgi Ólafsson annast skákskýringar. Í lok hverrar umferðar verða svo pallborðsumræður í umsjón stórmeistarans Simons Williams.

Mótið hefst með setningarathöfn í Hörpu klukkan fjögur í dag og eftir hana fer fram fyrsta umferð mótsins. Teflt verður daglega þar til móti lýkur þriðjudaginn 13. mars. Frekari upplýsingar um mótið og hliðarviðburði má sjá á heimasíðu Skáksambands Íslands. - þeb