Einkalífeyrissjóðurinn var ólöglegur

Sigurjón Þ. Árnason, fyrrverandi bankastjóri Landsbankans, fær ekki afhentan viðbótarlífeyrissparnað sinn og skuldabréf sem hann keypti fyrir andvirði hans. Hann tapaði dómsmáli um sparnaðinn í Héraðsdómi Reykjavíkur í gær.

Málið snerist um lífeyrissparnað Sigurjóns, sem stofnaður var sérstakur sjóður utan um í Landsbankanum fyrir hrun. Sparnaðinn notaði hann til að fjárfesta í skuldabréfum, meðal annars í erlendum fyrirtækjum á borð við rússneska gasrisann Gazprom. Sparnaðurinn fimmfaldaðist á þremur árum og stóð í tæpum 570 milljónum fyrir bankahrun.

Landsbankinn hefur viljað leysa sparnaðinn upp að kröfu Fjármálaeftirlitsins, sem taldi fyrirkomulagið ólöglegt. Sigurjón fékk hins vegar lögbann á aðgerðirnar.

Héraðsdómur komst að þeirri niðurstöðu í gær að Landsbankanum hafi verið heimilt að segja upp samningnum um lífeyrissparnaðinn og tók þar með undir sjónarmið bæði bankans og Fjármálaeftirlitsins. Sigurður G. Guðjónsson, lögmaður Sigurjóns, segir að dómnum verði áfrýjað til Hæstaréttar strax í dag. - sh